Viktig siger for Osterøy


VETERAN: Heine Solberg noterte seg på skåringslista i sesongens første tre-poengar. (Arkivfoto)

Det vart endeleg siger for Osterøy då Bremnes var gjestar på Hatland i eit forferdeleg ruskevêr fredag. Kampen enda 3-1 og etter ein mager poengfangst innleiingsvis denne sesongen har dermed Vidar Rosnes sine menn opna poeng kontoen.

 

-Me måtte vinna i dag, seier Vidar Rosnes etter kampen. –Bremnes er eit av dei laga me må holda bak oss om me skal klara målsetjinga om å behalda plassen i 4. divisjon. Eg er difor svært letta over at me klarte å dra sigeren i land, smiler han.

 

Osterøy fekk verst tenkeleg start på kampen. Etter berre 3 minuttar er det nemleg gjestane som går opp i 1-0 leiing. Eit skot frå distanse vert flikka vidare, stussar i det våte graset og fyk inn i Einar Gjerstad sitt lengste hjørne.

 

Det går heldigvis ikkje lenge før Osterøy kvitterar. Berre to minuttar seinare har heimelaget frispark ute på venstre sida. Ballen vert slått inn i feltet og etter litt klabb og babb er det Ronny Hansen som brått har ballen i beina på 11 meter. Han dreg av (!) ein forsvarar før han hamrar inn utlikningsmålet bak ein sjanselaus Bremnes-keeper.

 

Etter dette bølgar spelet ein del fram og tilbake utan at nokon av laga klarar å festa noko særleg grep om kampen. Stillinga held seg dermed til pause.

 

Andre omgang fortset i same sporet; stillingskrig på midten og få store målsjangsar. Etter eit drøyt kvarter går Torbjørn Hovden i bakken etter eit regelrett overfall på midtbana. –Bremnes spelaren hadde ingen moglegheit til å nå ballen og kunne lett trekt seg frå den duellen, rasar Rosnes etter kampen. –Torbjørn er oppe og stussar vidare ein pasning med hovudet og får Bremnes spelaren i skallen lenge etter at ballen er borte. Unødvendig! tordnar Osterøy-trenaren

 

Hovden, som fekk eit stort kutt i hovudet, vart geleida av bana og enda på legevakta der det vart sydd tre sting.

 

Bremnes er etter dette farlig frampå ved eit par høve og er uheldige som ikkje klarar å omsetja sjansane sine. Dette utnyttar Osterøy til fulle. Etter 33 minutt av omgangen stikk Thomas Langeland gjennom gjestane sitt forsvar. Den kjappe Osterøy-spissen gjer ingen feil åleine med keeper; 2-1 til Osterøy.

 

Og dermed løsna det for heimelaget. Berre tre minuttar etter er det duka for 3-1. Etter fine kombinasjonar på venstre sida, ender eit innlegg på pannebrasken til veteran Heine Solberg. –Eg anar ikkje kva som skjedde. Eg prøvde berre å komme meg bort frå situasjonen, smiler Solberg etter kampen. –Men du veit; det berre må bli siger når Ronny skårar med beina og eg skårar med hovudet. Då er nemleg alt mogleg.

 

Resultatet står seg til pause, og dei gul/grøne kan endeleg jubla for poeng. –No er det viktig at me tek med oss den gode følelsen inn i neste veke og til Krohnsminde på fredag, seier Rosnes. Der ventar Ny-Krohnborg som har hatt ein blanda sesongstart. –Det er ikkje umogleg og komma seg heim derifrå med eit godt resultat. Me kjem til å gå for siger, smiler Rosnes

Osterøy sitt lag: Einar Gjerstad, Andreas Kollvangsnes (Åge Bruvik), Ronny Hansen, Jens Lillefosse, Thomas Hole, Øyvind Tønjum, Kim Solberg, Kristian Daltveit, Frode Evensen (Martin Dyvik), Torbjørn Hovden (Heine Solberg) og Thomas Langeland

 

Aktivitetar

Open trening TURN
Osterøyhallen
07 mai
24 mai